დღე სასწაულს შორდება…
Posted 11:53 AM by Nina in თემები doin.ge, დღესასწაული, რელიგია, საქართველო, სოციალური ქსელი
from თითქმის EXCLUSIVE by Mchxapneli
“არსებობს მხოლოდ ორი დღესასწაული: ახალი წელი და ყოველი დღე” – თანამედროვე რუსული გამოთქმა
ჩვენ ძალიან გვიყვარს დღესასწაულები, მაგრამ კიდევ უფრო მეტად ამ დღესასწაულების მილოცვა გვიხარია. თორმეტს ჯერ გადაცილებული არ არის ხოლმე, რომ “სკაიპში”, “facebook”–ზე, მობილურში და სხვა საკომუნიკაციო საშუალებებში უკვე ჩნდება შემდეგი სახის სტატუსები/”მესიჯები”: “ყველას გილოცავთ :* :* :*” , “გილოცავთ all” , “მრავალს დაესწარით” , “ყველა გიორგის გილოცავთ გიორგობას” და ა.შ.
თუმცა, რა თქმა უნდა, ეს გლობალური მილოცვა საკმარისი არ არის და აუცილებელია, რომ შენს “სკაიპში” აბიბინებულ თითოეულ ნაცნობ–მეგობარ–ახლობელს (თუკი დაასწარი) ასეთი დიალოგი გაუმართო:
შენ: – გილოცაააავ! :* :* :* : )
ის: – სპს/–გაიხარე/(ან თუ მაინცდამაინც ღმერთი გაუწყრა) – “გმადლობთ”, შენც ასევე!
შენ: – : )
ამის შემდეგ, მსგავსი ტექსტი, გაფორმებული რელიგიურ–აბსტრაქტული სურვილებით, მობილურში უნდა გადაიტანო და ადრესატთა სახელების ცვლით, სანაცნობოს დარჩენილ ნაწილს დაუგზავნო. მისალოცი ტექსტების შაბლონი კი, დღესასწაულების სიმრავლის მიუხედავად , მაინც ერთია.
აქედან გამომდინარე მგონია, რომ ჩვეულებრივი “გილოცავ” ბევრად ჯობს ისეთ ყალბ და გაზეპირებულ ტექსტებს, როგორებიცაა: “იყოს მფარველი ცხოვრების რთულ გზაზე”, “დაესწარი მრავალს, სულ ჯანმრთელად და ბედნიერად”, “შენი და შენი ოჯახის შემწე”, “სიხარული, ბარაქა, ბედნიერება” და პლიუს ამას, ”კაცმა არ იცის, საიდან მოტანილი ლექსები”, თითოეული სტრიქონის “აო” ან “სო” დაბოლოებით (”უფალმა მრავალს დაგასწროს თავისი წყალობითაო, იხარე, იბედნიერე, მაგ შენი ოჯახითაო”/”მე მოგილოცავ ამ დღესო, გხედავდე სულ ბედნიერსო”).
ვერც იმას ვხვდები, თუ რა აუცილებელია “სკაიპის სტატუსად გეყენოს” ის, რომ შენს ახლობელს დაბადების დღეს, ბავშვის გაჩენას, ბინის ყიდვას, გამოჯანმრთელებას, წვერის გაპარსვას, მენჯის მოფხანას, ქუთუთოს თამაშს და მსგავს რაღაცეებს ულოცავ.
კიდევ უფრო უარესია მილოცვა გაზეთით, მილოცვა სარეკლამო სტრიქონით და მილოცვა ბილბორდებზე გამოსახული წარწერით “მე თბილისელი ბიჭი ვარ”. ამ განცხადებას მაინც მარტო ის წაიკითხავს, (თუ წაიკითხა საერთოდ) ვისთვისაც მნიშვნელოვანია და ვისაც უგანცხადებოდაც მიელოცება (რომ რამე). მაგალითად, ჩემთვის სულ ერთია, რომ ბებია და ბაბუა პატარა ელენიკოს დაბადების დღეს ულოცავენ და მისი დიდი გოგოობის პერსპექტივებზე საუბრობენ. ვერც ისეთი ადამიანი წარმომიდგენია, რომელიც გაზეთს ან ჟურნალს გადაშლის და უცნობი ხალხის მილოცვების კითხვას დაიწყებს.
