თუ თვლი რომ მუსიკა დროსთან ერთად ვითარდება, უსმენ მხოლოდ თანამედროვე ჯგუფებს და 40 წლის წინ ჩამოყალიბებული ჯგუფის მოსმენა მიზანშეწონილად არ მიგაჩნია, მაშინ შეგიძლია დაივიწყო შენი სნობური დამოკიდებულება მუსიკისადმი და უბრალოდ მოისმინო Deep Purple-ს Bananas.(2003)
ალბომი ენერგიულად იხსნება ლეგენდარული ვოკალისტის იან გილანის ტრადიციული კივილით და გადადის შედარებით მძიმე ჟღერადობის თრექზე Sun Goes Down. როკ-ბლუზ-სოულის ფანებს ამ ალბომში ულამაზესი სიმღერა Haunted ელოდებათ. ვინ თქვა რომ დიფ ფარფლი, ეს მხოლოდ კლასიკური როკია? მოისმინეთ Walk On თუ გინდათ დარწმუნდეთ, როგორ უნდა დაიწეროს ნამდვილი თანამედროვე ბლუზი. ფარფლური ჰარდ-როკის მაგალითია Picture of Innocence სტივ მორსის მსუბუქი ბლუზ-ინტროთი, ხოლო მისამღერში კი ნამდვილ ”ფარფლურ” მძიმე განწყობაზე გადაჰყავს მსმენელი. ალბომის შემდეგი სამი სიმღერა, სამი ნამდვილი მარგალიტი ერთმანეთის მიყოლებითაა დალაგებული.
წარმოიდგინეთ რომ ჩართეთ Never A Word და არ იცით შემსრულებლის ვინაობა. თუმცა ივარაუდებთ თანამედროვე, 2000-იანი წლების მეგა ინდი-ფოლკ ჯგუფებს, ხოლო ვოკალისტებად - ამ ჯგუფების მაქსიმუმ 25 წლის ვოკალისტებს. როდესაც გაიგებთ რომ ამ სიმღერას Deep Purple უკრავს, ხოლო ვოკალზე 63 წლის იან გილანია, გაოცებისაგან შეიძლება პირი დააღოთ.
მივედით იქამდე, რასაც ყველაზე ნაკლებად ელოდით: Doing It Tonight - როკ მუსიკის, ჰიპ-ჰოპისა და ფანქის გენიალური ნაზავი, გილანის მინი-რეჩიტატივით მისამღერში. საბოლოოდ კი ალბომს სტივ მორსის წუთნახევრიანი ინსტრუმენტალი ასრულებს.
Bananas - ესაა ერთ-ერთი ყველაზე მოულოდნელი ალბომი როკ-მუსიკის ისტორიაში. მოულოდნელი თავისი კონცეფციით, ყდით, მრავალფეროვნებით და თანამედროვეობით.
დიფ ფარფლის წევრებისთვის კი ასეთი ალბომის ჩაწერისათვის იდეების არსებობა სირთულეს არ წარმოადგენს, როგორც თვითონ ამბობენ, მათთვის it is just fun.
ხოდა, მოისმინეთ ბანანები და just have a fun.
